Ақмола облысында «Аңсаған сәби» бағдарламасы сәтті жүзеге асырылуда. Бұл бағдарлама міндетті әлеуметтік медициналық сақтандыру (МӘМС) арқылы қаржыландырылады және бедеулікке шалдыққан отбасыларға экстракорпоральды ұрықтандыру (ЭКО) рәсімін тегін өтуге мүмкіндік береді.

Бағдарламаға кімдер қатыса алады?

Бағдарлама бедеулікті емдеудің терапиялық әдістері нәтиже бермеген отбасыларға арналған. Оған 18-ден 42 жасқа дейінгі қазақстандық ерлі-зайыптылар қатыса алады. Әр сақтандырылған азамат жылына бір рет ЭКО жасауға құқылы. Егер бірінші әрекет сәтсіз болса, келесі жылы қайтадан кезекке тұруға болады.

Жолдаманы қалай алуға болады?

Алдымен емханадағы гинекологқа жүгіну қажет. Гинеколог көрсетілімдер болған жағдайда репродуктологқа жолдама береді. Қажетті тексерулерден кейін құжаттар дәрігерлік-консультативтік комиссияға (ДКК) жіберіледі. Комиссияның оң шешімі шыққан жағдайда, ерлі-зайыптылар ЭКО кезегіне қойылады.

ЭКО қайда жасалады?

МӘМС аясында Қазақстан бойынша 19 клиника ЭКО қызметін ұсынады, оның ішінде мемлекеттік және жеке клиникалар бар. Науқастар fms.kz сайтына кіріп, «Пациентке» бөлімінде «ЭКО қызметін көрсететін медициналық ұйымдар тізімін» жүктеп, өздеріне қолайлы клиниканы таңдай алады.

Қаржыландыру және шығындар

Бір пациентке шамамен 1 миллион теңге бөлінеді. Оның 600 мың теңгесі гормоналды препараттарға, қалғаны шығын материалдары мен басқа да қызметтерге жұмсалады.

Қандай жағдайларда ЭКО жасалмайды?

Егер пациентте жатырдың туа біткен немесе жүре пайда болған ақаулары, психикалық ауытқулар, онкологиялық аурулар немесе жедел қабыну процестері анықталса, ЭКО жасалмайды.

Анықтама

Бағдарламаға қатысу бойынша сұрақтарыңыз болса, емханаңыздағы Пациенттерді қолдау қызметіне жүгінуге болады. Сондай-ақ, сұрақтарыңызды Qoldau 24/7 мобильді қосымшасы, fms.kz сайты немесе 1414 байланыс орталығы арқылы Әлеуметтік медициналық сақтандыру қорына жолдай аласыз.

«Аңсаған сәби» бағдарламасы мыңдаған отбасына ата-ана болу бақытына қол жеткізуге көмектесіп келеді. Ақмола облысының тұрғындары да осы мүмкіндікті пайдалана алады.